Ippubblikata Preliminary Market Consultation (PMC) biex titfassal strateġija bil-għan li l-pajjiż ikun iktar reżiljenti

Ġiet ippubblikata Preliminary Market Consultation (PMC) bil-għan li jkunu ingaġġati esperti fl-iżvilupp tal-Pjan Nazzjonali għat-Tibdil fil-Klima li qed tiżviluppa l-Climate Action Authority.

L-għan ta’ din il-PMC hu li tikseb tagħrif dwar id-disponibbiltà tal-għarfien meħtieġ biex ikun żviluppat dan il-pjan, u tidentifika strateġiji li jistgħu jkunu implimentati bħala parti mill-istess pjan, f’konformità mal-impenn ta’ Malta għar-reżiljenza klimatika u r-responsabbiltajiet skont il-Ftehim ta’ Pariġi u l-leġiżlazzjoni tal-Unjoni Ewropea dwar il-klima.

L-Inġ. Abigail Cutajar, il-Kap Eżekuttiv tal-Climate Action Authority stqarret: “Li nindirizzaw it-tibdil fil-klima tinvolvi mhux biss sforzi biex inaqqsu l-emissjonijiet, iżda wkoll biex nadattaw għall-impatti tagħha. L-awtorità se tiżviluppa dan il-pjan bis-sehem ta’ esperti, imsieħba soċjali u s-soċjetà. L-għan tagħna hu li nintegraw ir-reżiljenza klimatika fl-ekonomija u l-ħajja ta’ kuljum tagħna, filwaqt li ngħinu l-komunitajiet jipparteċipaw f’din it-tranżizzjoni.”

Il-Pjan Nazzjonali ta’ Adattament għat-Tibdil fil-Klima  għandu l-għan li jsaħħaħ l-abbiltà ta’ Malta biex tipprepara għall-adattament u r-riskji li ġġib magħha il-bidla fil-klima. Permezz ta’ din il-PMC qed issir sejħa għall-azzjonijiet prattiċi li jindirizzaw l-iktar vulnerabilitajiet urġenti.

Il-PMC tista’ tinkiseb minn fuq l-e-PPS permezz ta’ din il-ħolqa:

https://www.etenders.gov.mt/epps/pmc/listPmcContractDocuments.do?resourceId=12429530